Söknuður að Montoya

Ég ætla að segja það alveg umbúðalaust - það er söknuður að Juan Pablo Montoya sem sagt hefur skilið við formúluna og ráðið sig til að keppa í þjóðarakstursíþrótt Bandaríkjanna, NASCAR-kappakstrinum. Montoya hefur kunnað vel við sig í Bandaríkjunum, enda nær menningarheimi sínum þar en í Evrópu. Þar hefur hann afrekað, sem og í formúlunni.   

Montoya sló í gegn þegar á fyrsta ári í formúlunni, árið 2001 með Williams. Jafn djarfan ökuþór höfðu unnendur íþróttarinnar ekki fengið að sjá lengi. Lét strax verulega til sín taka, varð annar í Evrópukappakstrinum og í Barcelona og kórónaði svo fyrsta tímabilið með sigri í Monza.

Þetta þótti gefa góð fyrirheit en Montoya hafði aldrei nógu almennilega bíla, hvorki hjá Williams né McLaren í ár og í fyrra, til að slást af alvöru um heimsmeistaratitil ökuþóra. Varð þó í þriðja sæti bæði 2002 og 2003.

Montoya hefur fyrst og fremst gengið til leiks sem íþróttamaður en ekki sem fulltrúi einhverra markaðsafla eða hagsmuna keppnisliða sinna. Keppt af krafti en samt drengskap. Notið sín í návígi en fremur gefið eftir eða tekið tapi í stað þess að beita bellibrögðum.

Þá hefur hann verið hreinskiptinn og talað tæpitungulaust, oft svarað flóknum eða leiðandi spurningum með jái eða nei. Ekki bunað út úr sér einhverri loðmollu eins og lesið væri upp úr handriti sem markaðsstjóri liðsins hefði skrifað fyrir hann. Sem er alltof algengt í formúlunni.

Hvort sem menn eru sammála mér eða ekki um að söknuður sé að Montoya þá fer ekki á milli mála að hann hefur verið með litríkari persónuleikum hennar. Fyrir hvern einn slíkan sem hverfur á braut tapar formúlan. Ég sé ekki að skarð hans verði fyllt alveg strax. Það verður bara að koma í ljós hvenær það gerist.

Ég hef um dagana fylgst nokkuð með NASCAR á Eurosport-stöðinni. Ótrúleg íþrótt þar sem tugir bílar keyra á 400 km/klst hraða og kannski ekki nema nokkrir sentimetrar á milli stuðaranna eða hliðanna. Oftast í sporöskjulaga brautum. Ef eitthvað bregður útaf í návíginu, sem oftast gerist í hverju móti, geta afleiðingarnar verið hrikalegur hópárekstur.

Það er ómögulegt að segja nokkuð um hvernig Montoya muni ganga í þessari íþrótt en hann verður þó hjá góðu liði. Hjá sama vinnuveitandanum og hann færði titil í systurkeppni formúlunnar í Bandaríkjunum 1999, CART-kappakstrinum (líka nefnt ChampCar). Árið eftir komst hann í þann úrvalshóp ökuþóra sem unnið hefur hinn fræga Indy 500-kappakstur.

Athugasemdir

[Hafsteinn Elvar Jakobsson (IP-tala skráð) 13.7.2006 kl. 12:43]

Sammmála mörgu í þessari grein. Montoya hefur líka verið dálítið mistækur eða kannski bara óheppinn. Verðugur liðsfélagi Kimi. Oft teflt á tæpasta vað sem hefur komið honum um koll. Alls ekki neikvætt, síður en svo því svona karakter lífgar oft upp á keppnina. Til þess að vera alvöru meistari þarf þrennt: að aka frammúrskarandi bíl, vera útsjónarsamur og þekkja sín takmörk. Þetta sjáum við vel í þeim sem eru á toppnum hverju sinni. Alonso er gott dæmi þó ekki sé hann minn maður.

[Hörður (IP-tala skráð) 15.7.2006 kl. 17:31]

Það er komin tími til að Montoya snúi sér að einhverju sem að henti honum betur og NASCAR er óneitanlega meira að hans skapi, nóg af árekstrum og stuðaranuddi.

[Svavar (IP-tala skráð) 19.7.2006 kl. 17:52]

Vona að Montoya gangi sem best í usa, ekki mikill söknuður hjá mér persónulega, en það er samt staðreynd að hann náði ansi oft að keyra til enda. En held þó samt að hann hafi ekki fengið sama back up innan liðs síns eins og Kimi. Ef Pedro stendur sig vel áfram, þá fer kanski eitt af bestu liðum F1 að sanna sig aftur! Hálfgerð hneisa að bens/mclaren geti ekki komið með bíla sem þola öfluga og hraða ökumenn eins og Kimi!
Góðar F1 stundir. Svavar.

[ots (IP-tala skráð) 21.7.2006 kl. 23:10]

Montoya farinn og Schumi hálf svekktur, svo hann getur ekki haldið áfram að sasskella hann. Nei ekki get ég sagt að ég sakni hans og ekki held ég að tæknimenn mclaren sakni hans heldur þar sem hann sást hella sér yfir þá eftir að hann gerði akstursmistök. Þeir sem ná árangri eru þeir ökumenn sem eru í góðu sambandi við sína tæknimenn eins og Schumi, Alonso, Senna og fleiri toppökumenn. Einnig verða þeir að hafa það til að bera að vera í topp jafnvægi á hvaða hraða sem er. Því miður hefur Montoya ekki þetta jafnvægi til að bera, þó hann sé hraður ökumaður, enda gafst hann upp á miðju tímabili eða Formulan gafst upp á honum. Þetta er nátturulega bull sem Dennis er að hann geti kallað á Montoya aftur auðvitað kemur hann ekki aftur hlutirnir ganga ekki svona fyrir sig í Formúlunni. Montoya snýr sér nú að barneignum og fer síðan í NASCAR á næsta ári og það er allveg á hreinu að það verður ekki tekið neinum vettlingatökum þar á honum. Ef það er einhverstaðar sem ökumenn verða að vera í góðu sambandi við sína tæknimenn þá er það í NASCAR. Þetta eru harðir naglar í topp líkamlegu formi og keyrslan er þannig að ekkert má bera útaf annars er öll nótt úti. Menn skulu ekki gera lítið úr NASCAR kappakstrinum það eru eingöngu hörðustu naglarnir sem duga þar. Það verður gaman að fylgjast með hvernig Montoya mun ganga í NASCAR og ég vona að honum gangi vel í, þó ég persónulega hafi ekki trú á því.
Gamall Irvine aðdándi