Toppliðin í dag og hin toppliðin . . .

Spurning er hvort með sigri Red Bull í Kína og Brawnliðsins í Melbourne og Malasíu sé að eiga sér stað róttæk uppstokkun í formúlu-1? Umpólun á styrkleika liðanna? Í sjálfu sér hef ég enga trú á að svo sé.

Form er yfirleitt til bráðabirgða - menn kannast við hugtakið dagsform - en klassi er varanlegur.

Þótt árangur þeirra sé glæsilegur og sérdeilis aðdáunarverður, þá tel ég ekki að Red Bull og Brawn séu að taka við af t.d. Ferrari, McLaren og Renault sem leiðandi lið formúlunnar. Fyrrnefnd tvö lið eru þó óumdeilanlega toppliðin í dag. Toyota og Williams eru skammt undan.

En ég hef enga trú á öðru en liðin sem búa að fornri frægð eigi eftir að sýna mátt sinn og megin aftur. 

 

Athugasemdir

[Einar Steinsson, 21.4.2009 kl. 08:52]

Ég verð að segja að ég er ánægður með að Red Bull er loksins farið að sýna hvað það getur. Þetta lið er búið að vera "mitt lið" frá því að Ford keypti það af Sir Jackie Stewart og skýrði það Jaguar og maður var orðinn svolítið langeygður eftir að sjá árangur. Ég hef hins vegar fulla trú á að Red Bull Racing komi til með að halda sig nálægt toppnum héðan í frá, nú eru þeir loksins komnir með ökumann sem ég hef trú á að sé fyrsta flokks, Sebastian Vettel og og við hlið hans er ágætur "stuðningsökumaður" Mark Webber þannig að sá hluti er loksins í lagi. Hvað fjármagn varðar ætti það ekki að vera vandamál þar sem Dietrich Mateschitz eigandi liðsins er ekki bara í þessu til að auglýsa Red Bull orkudrykkinn heldur er hann ástríðufullur áhugamaður um kappakstur og virðist ekki bara hafa endalaust fjármagn heldur er hann líka afskaplega viljugur að eyða því í áhugamálið. Hann á auk tveggja F1 liða NASCAR lið, að minnsta kosti tvö fótboltalið, hann á A1 brautina í Austurríki, og hann heldur keppnir í listflugi út um allan heim og á fjölda flugvéla. Ef þið eruð á ferðinni í Austurríki, nánar tiltekið Salzburg þá mæli ég með að þið heimsækið "Flugskýli 7" (Hanger 7) við flugvöllinn í Salzburg en Dietrich Mateschitz á bæði flugskýli 7 og 8 og númer 7 er búið að breyta í flugvélasafn með veitingahúsi og börum. Þetta er heldur ekki venjulegt flugskýli heldur er húsið þess virði að skoða það eitt og sér.