Alvarlegar ásakanir og afleiðingarnar geta orðið harðar

Þangað til annað kemur í ljós ætla ég ekki að leggja hinn minnsta trúnað á ásakanir brasilískrar sjónvarpsstöðvar um að Renault hafi svindlað sér til sigurs í Singapúr í fyrra. Hræddur er ég um að þessi kenning sé ein afleiðing af þeirri hrikalegu og langvarandi fýlu sem Nelson Piquet hefur verið í eftir að hann var settur af hjá liðinu.

Samsæriskenningar í þessa veru komu upp á sínum tíma en voru fljótt afskrifaðar og engin gögn komu fram er studdu þær. Vegna nýju ásakananna er eðlilegt að lagst verði yfir málið á ný, ekki síst ef Piquet heldur þessu fram. Þ.e. að hann hafi fengið fyrirmæli um að klessukeyra bíl sinn í kappakstrinum svo keppnisáætlun Fernando Alonso gengi upp. Hann átti að stoppa snemma á bensínlitlum bíl en Piquet seint. Þær áætlanir byggðust á tilgátu um að öryggisbíll yrði kallaður út í brautina. 

Og það gerðist einmitt eftir að Piquet klessti. Alonso hafði rétt áður stoppað til að taka bensín og ný dekk. Var því fyrstur er keppnin hófst að nýju er hlutverki öryggisbílsins var lokið. Lét hann ekki happ úr hendi sleppa og ók til sigurs.

Víst er að afleiðingar þessara ásakana geta orðið alvarlegar. Reynist þær réttar verður bæði Renault og Piquet hegnt harkalega, jafnvel í keppnisbann. Komi hins vegar í ljós, að um þvætting sé að ræða eða ósannanlegar tilgátur sleppur Renault. Verði ásakanirnar raktar til Piquet fær hann líklega á baukinn fyrir að koma óorði á íþróttina, reynist þær staðlausar.

Þetta er að sönnu grafalvarlegt mál hver svo sem niðurstaðan verður. Og alls ekki sú auglýsing sem formúla-1 þarf á að halda. Ég held hins vegar þetta sé bull og velti fyrir mér siðferði brasilísku stöðvarinnar að halda þessu fram án þess að tilgreina það nánar. Til dæmist hvenær og hvernig Piquet var beðinn að klessa og hver eða hverjir báðu hann um það.

Væntanlega koma margir við sögu í samsæri af þessu tagi; stjórnendur og ökumenn í það minnsta. Einu áþreifanlegu sönnunargögnin eru talstöðvarfjarskipti milli stjórnborðs ökumannanna. FIA hefur alltaf haft aðgang að þeim og skoðaði á sínum tíma. Hver nýju gögnin sem brasilíska stöðin heldur fram að séu til verður fróðlegt að heyra um.

Sé þar einungis um að ræða fullyrðingar Piquet þá mun hann væntanlega sitja uppi með þær sjálfur. Það er ekki nóg að honum hafi verið mislagðar hendur í keppni og lítið sýnt. Heldur hefur hann sýnt einkennilegt dómgreindarleysi frá því hann var leystur undan samningi sem hann gat sjálfur ekki efnt.  

 

Athugasemdir

[Jóhann Elíasson, 1.9.2009 kl. 17:59]

Ég vil nú ekki alveg "gleypa" þessar ásakanir hráar, þó svo að Alonso sé ekki í uppáhaldi hjá mér, þá veit ég ekki til að hann hafi beitt neinu óheiðarlegu til að vinna sigra hann er einfaldlega það góður ökumaður, eins og hann hefur margoft sýnt, að hann hefur ekki þurft á neinum "monkey buslness" að halda.  En það verður að segjast að staða Piquets í þessu máli er síður en svo glæsileg að mínu mati.

[Ómar Már Þóroddsson (IP-tala skráð) 7.9.2009 kl. 18:20]

Þegar menn tala um að dæma ekki í þessu máli á það þá ekki við Piquets? Menn ætla bara að sleppa því að dæma Renault. Það finnst mér skrítið. Hélt að best væri að skoða þetta þegar menn vita meira.

[Ágúst Ásgeirsson, 8.9.2009 kl. 18:29]

Átta mig ekki alveg á hvað þú meinar, Ómar Már. Verði sannað, að Renault hafi svindlað verður liðið dæmt hart. Án sannana verður hins vegar ekki hægt að dæma menn. 

Það er engin spurning, að leggja á ráðin og valda árekstri vísvitandi er stór alvarlegt mál. Bókstaflega glæpsamlegt því kappaksturinn er nógu hættulegur fyrir. Ekki er aðeins ökumanni og keppinautum hans stefnt í voða, heldur einnig starfsmönnum móts og áhorfendum. 

Komi í ljós, að ásakanirnar séu frá Piquet komnar og enginn fótur finnist fyrir þeim, þá er hann í miklum vanda. Annars vegar hefði hann komið óorði á íþróttina og hins vegar valdið málaþrefi með staðlausum stöfum. Það er það sem átt er við þegar ég segi hann gæti verið í miklum vanda vegna málsins.

Hafi hann samið við FIA um að kjafta frá einhverju misjöfnu sleppur hann kannski við refsingu. En reynist allt rétt, með samsærið um að hafa áhrif á úrslitin, þá hefur hann tekið þátt í því samsæri. Það eitt útaf fyrir sig er saknæmt.

Mér finnst ótrúlegt eftir allar yfirlýsingarnar frá honum og slakan árangur, að hann eigi afturkvæmt í formúluna. Ekki síst eftir að ekkert varð úr kaupum pabba hans á BMW-liðinu.

Það verður alla vega fróðlegt að fylgjast með þessu máli og sjá málavöxtu. Kannski er ég að gera hlut Piquet í málarekstrinum of mikinn. Kannski er bara Max Mosley að reyna að klekkja á fjandmanni sínum, Renaultstjóranum Flavio Briatore. Hún er svon undarleg pólítíkin sem Mosley hefur rekið að maður getur ekki látið neitt koma sér á óvart úr þeirri átt.

Í þessu sambandi má minnast þess, að Mosley fékk McLarenliðið dæmt í 100 milljóna dollara sekt og útstrikunar úr stigakeppni árið 2007 fyrir að í fórum liðsins fundust tæplega 800 síður af gögnum sem starfsmaður hjá Ferrari hafði laumað til aðalhönnuðar McLaren. Það tókst ekki að sanna að gögnin hefðu verið notuð McLaren til framdráttar, eins og liðið var ákært fyrir í upphafi. Þar var dæmt á ætluðum líkum á að hægt hefði verið að notfæra sér gögnin. 

Vonandi verður ekki framið annað eins dómsmorð í þessu máli.