Hungaroring mjúkhentur á mótorana

Ungverski kappaksturinn er framundan. Brautin í Búdapest,  Hungaroring, er frábrugðin flestum öðrum og er heilmikil áskorun, bæði fyrir ökumenn sem tæknimenn liðanna. Þar er engum hröðum beygjum fyrir að fara og fyrir vikið er mesta mögulega vængpressa notuð – til að tryggja sem bestan hraða í beygjum og veggrip og ennfremur hámarka skilvirkni hemla. Mikil áhersla er lögð á skilvirka mótorkælingu vegna mikils lofthita og lítils bílhraða.

Fyrir ökumenn er kappaksturinn hin mesta raun. Lofthiti er jafnan mikill á mótstíma í Búdapest og bugðótt 14 beygju brautin er þannig úr garði gerð, að ökumenn fá nánast enga hvíld á hringnum, en 70 slíkir eru eknir í kappakstrinum. Í raun þykir aðeins einn staður mögulegur til framúraksturs, en það er fyrsta beygja hringsins í lok 700 metra langs beins kafla.

Að beina kaflanum frátöldum er hringurinn samsettur úr nokkrum röðum hraðalítilla beygja eða meðalhröðum. Bremsukaflar fyrir þær eru stuttir og framúrakstur á þeim í besta falli illmögulegur. Sjaldgæft er að bílar nái 300 km/klst hraða á beina upphafs- og lokakaflanum.

Vélræn rásfesta er mikilvæg í hinum hægu beygjum í Búdapest og því er fjöðrunarbúnaður hafður mýkri en í öðrum brautum, að Mónakó frátalinni. Ökumenn vilja snarpan bíl í hægu köflum brautarinnar með góðu veggripi út úr beygjum. Því er venjulega mætt með því að hafa framfjöðrunina eilítið stífari en afturfjöðrunina. Áhrif hefur á þær stillingar að lokum hvernig bílarnir slíta dekkjum á föstudagsæfingunum.

Hungaroring reynir minna á vélar bílanna en flestar brautir. Lengsti kaflinn sem ekinn er í botni tekur aðeins um 10 sekúndur. Og í heildina er aðeins 56% hringsins ekinn með bensínfetilinn í botni, sem er miklu lægra hlutfall en í flestum brautum öðrum.

Af 14 beygjum hringsins eru fimm eknar í öðrum gír á um 100 km/klst. hraða. Minnsti beygjuhraði er 90 km. Ökumenn hafa þörf fyrir gott tork út úr svo mörgum hægum beygjum sem er að finna í Búdapest. Mestan hringinn er hraðasviðið tiltölulega lítið eða á bilinu 100 - 250 km/klst. Gírkassi er því settur þannig upp að stutt er í gírum til að tryggja sem skilvirkust afköst á hraðabilinu.

 

Athugasemdir

[Jóhann Elíasson, 30.7.2008 kl. 21:47]

Það er nokkuð ljóst að keppnin þarna á eftir að verða hörð og þjónustuhléin eiga eftir að spila einna stærsta hlutverkið í kappakstrinum um helgina.  Tímatakan á laugardaginn held ég að eigi eftir að skipta sköpum.

[Óli Sveinbjörnss, 31.7.2008 kl. 23:48]

Mikið er ég ánægður með bloggið þitt Ágúst. Maður kemst bara í stuð og getur varla beðið eftir helgini eftir lesninguna hjá þér. Sammála Stýrimanninum með að tímatökurnar skipta sköpum og þjónustuhléin. Einnig held ég að reynslumestu ökuþórarnir fari slysalaust í gegnum keppnina og ef einhver gerir mistök þá verður það einhver nýliðin. Annars er ég búin að fara á nokkur mót og Ungverjaland er næst á dagskrá með gúllassúpa og alles. Takk fyrir gott blogg.

[Ágúst Ásgeirsson, 1.8.2008 kl. 11:45]

Þakka þér Óli vinsamleg ummæli. Ánægja þín gleður mig. Tek undir með ykkur Jóhanni um Búdapest og tímatökurnar. Vonandi verður keppnin skemmtileg og eitthvað um óvæntar niðurstöður.