Senuþjófurinn Schumacher

Það var skemmtileg tilbreyting að fylgjast með bílprófunum í Barcelona í vikunni. Michael Schumacher stal þar heldur betur senunni. Skyldu Kimi Räikkönen og Lewis Hamilton hrósa happi að hafa ekki þurft að taka þátt?

Það muna þeir aldrei viðurkenna en verður maður ekki að álykta sesm svo, að gamli meistarinn hefði tekið þá í kennslustund? Það var allavega raun Felipe Massa.

Það var ekkert sem benti til þess að Schumacher hafði ekki ekið Ferrarifáknum sem orð er á gerandi í heilt ár. Miklu líkara því sem hann hefði aðeins tekið sér frí í einn til tvo daga.

Geta ber þess Massa til varnar að Schumacher hefur mikla reynslu af akstri formúlubíla án hjálparbúnaðar en Massa enga. Í því liggur alla vega hluti skýringarinnar á muninum á þeim. Og ég býst nú frekar við því að aðrir ökuþórar dragi Schumacher uppi með meiri æfingu í akstri án spyrnustýringar o.s.frv.

Það væri sem sagt ekkert að því að fá að sjá til hans oftar í vetur með þetta í huga. Hvaða hug ætli aðrir ökuþórar beri til þess? Að þurfa kannski stöðugt að sjá undir iljarnar á honum? Það væri eigi góð auglýsing fyrir þá. En ætli þeim standi kannski ekki alveg á sama?

 

 

 

 

 

Athugasemdir

[Jóhann Elíasson, 21.11.2007 kl. 16:58]

Ég er ekki frá því að menn hafi verið fegnir því að vera ekki á staðnum.

[Ágúst Ásgeirsson, 23.11.2007 kl. 10:50]

Tek alveg undir það. Nú verður fróðlegt að sjá hvernig fer í Jerez í fyrstu viku desember. Ætli það sama verði uppi á teningnum þar og í Barcelona?