Síðasta mótið í sveitinni

Tímamót verða líklega í Magny-Cours í Frakklandi um helgina. Hugsanlega er það í síðasta sinn sem þar verður keppt í formúlu-1. Og jafnvel að a.m.k. einhverra ára hlé verði á mótshaldi í þessu upphafslandi Grand Prix-kappaksturs.

Ástæðurnar eru fjárhagslegar og aðallega gríðarleg þóknun sem Bernie Ecclestone krefst fyrir hönd fyrirtækis síns af mótshöldurum fyrir framkvæmdaréttinn.

Grand Prix-kappakstur á rætur að rekja til bílakeppni sem hófst í Frakklandi árið 1894. Sprettir í borgum og bæjum þróuðust smám saman í þolakstur, bæði fyrir mann og bíl. Fljótlega náðu bílarnir ógnarhraða, hátt í 200 km/klst, en þar sem keppni fór fram á opnum vegum voru slys tíð, bæði á keppendum sem og áhorfendum.

Grand Prix-kappakstur þróaðist smám saman og er formúla-1 bein afleiðing þess. Hún kom til sögunnar 1950 með sameiningu nokkurra GP-landsmóta í mótaröð. Fyrsta mótið fór fram í Silverstone í Bretlandi, en einnig var keppt í Mónakó, Indianapolis, Sviss, Belgíu, Ítalíu og Frakklandi. Formlega eru orðin Grand Prix enn í heiti hvers formúlumóts. Þannig heitir mót helgarinnar 91. Grand Prix Frakklands.

Fyrsti franski formúlukappaksturinn fór fram í Reims 2. júlí 1950. Keppt hefur verið í Frakklandi allar götur síðan að árinu 1955 frátöldu. Nokkru áður en mótið skyldi fara fram biðu tugir áhorfenda bana í alvarlegu slys í sólarhringskappakstrinum í Le Mans. Í hluttekningarskyni var formúlumótinu aflýst.

Þau tíðindi eiga sér stað í dag, að Michael Schumacher sest undir stýri Ferraribíls og ekur honum í Magny-Cours strax eftir tímatökurnar. Er bíllinn þannig búinn að Schumacher getur tekið farþega með sér. Meðal gesta hans í bílnum verður franska fótboltagoðið Zinedine Zidane.

Zidane verður heiðursgestur franska kappakstursins og þiggur þeysireið um brautina í Ferrari FXX-bílnum. Aksturinn er liður í fjáröflunardegi fyrir stofnun og líknarfélag sem helga sig rannsóknum á mænu- og heilasiggi barna og meðferð þeirra.

„Það er mér mikill heiður að fara á franska kappaksturinn í Magny-Cours. Spennandi keppni í formúlunni í ár er mjög áhugaverð fyrir unnendur íþróttarinnar eins og mig. Þangað fer ég þó fyrst og fremst til að styðja ICM, stofnunina sem hefur það að markmiði að gefa mönnum tækifæri á að vinna bug á tilteknum taugasjúkdómum,“ segir Zidane af þessu tilefni.

Magny-Cours er eiginlega út í sveit, fjarri frönskum stórborgum. Vinnur það bæði með mótshaldi þar og með. Ökuþórarnir kunna margir við rólegheitin og að geta hvílst fjarri glysi og innihaldslausu glamri sem fylgir mótum víða. Nú er að sjá hvort bæjaryfirvöldum í Versölum í útjaðri Parísar verði að ósk sinni og að þar verði keppt innan tveggja ára eða svo.

Annar kostur væri að halda franska kappaksturinn í Paul Ricard-brautinni skammt frá Marseilles. Hún er til reiðu og í eigu Bernie Ecclestone, aðeins þarf að slá upp fleiri stúkum, sem ætti ekki að veta tiltökumál.

Athugasemdir

[Hörður Jónsson (IP-tala skráð) 3.7.2007 kl. 15:28]

Sæll Ágúst og takk fyrir góða fararstjórn á Silverstone 2005.

Er að fara á F1 Istanbul,veistu um góð hótel næri brautinni

Kv Hörður.

[Ágúst Ásgeirsson, 5.7.2007 kl. 15:55]

Sæll Jóhannes og þakka þér, það var gaman í þessari ferð á Silverstone og ég get ekki hugsað þá hugsun til enda að menn skuli vera að ræða í alvöru að hætta keppni þar!

Vonandi skemmtirðu þér vel í Istanbúl. Ég þekki ekki til í nágrenni brautarinnar en hef tvisvar komið til þessarar miklu borgar. Í fyrra skiptið gisti ég á Svisshotel, sem er Evrópumegin í Istanbúl, niður undir Hellusundi og skammt frá brúnni stóru sem tengir saman Asíu og Evrópu. Hitt hótelið er í suðurjaðrinum, líka Evrópumegin,  og því fjarri brautinni.

Þér er líklega engin hjálp í þessu, því miður.

Með kveðju

Ágúst 

[Ágúst Ásgeirsson, 6.7.2007 kl. 14:45]

Afsakaðu Hörður, ég ruglaðist á nöfnum, en ég tek að sjálfsögðu undir með Jóhannesi varðandi kappakstur hér í Frakklandi. Hér er gríðarlegur áhugi á akstursíþróttum en það verður að vera fjárhagslegur grundvöllur fyrir mótshaldi.

Til viðbótar gríðarlegum tekjum fyrir sjónvarpsrétt krefst Bernie Ecclestone tugi milljóna dollara þóknunar frá mótshöldurum. Það hefur hann komist upp með í þriðja heims ríkjum undanfarin ár þar sem ríkið hleypur undir bagga. Slíku er ekki fyrir að fara í vestrænum ríkjum, t.d. hér í Frakklandi. Ég velti því fyrir mér hvort þessi árátta að fara með mótin út um nýjar jarðir eigi ekki eftir að koma í hausinn á mönnum síðar meir. Það eru fyrst og fremst evrópskar stöðvar sem eru að kaupa sýningarréttinn og borga hann dýru verði. En fari mótin mörg fram meðan fólk sefur hér dettur grundvöllurinn væntanlega undan öllu saman. Sofandi fólk horfir ekki á auglýsingar sem borga útsendingarnar!

Við verðum bara að vona það besta, en ég mun hætta að horfa á formúluna þegar ekkert mót verður lengur í Frakklandi, Silverstone og Monza!